អាហ្វហ្គានីស្ថាន៖ ជាដំណឹងដ៏គួរឱ្យសោកសៅមួយ ដែលមនុស្សគ្រប់គ្នាមិនចង់ជួប ពោលគឺយុវជនវ័យ ១៩ឆ្នាំម្នាក់ដែលជាកីឡាករបាល់ទាត់ជម្រើសជាតិ បានជួបឧបទ្ទេវហេតុដ៏អាក្រក់មួយ និងស្លាប់បាត់បង់ជីវិតអំឡុងពេលចលាចលក្នុងអាកាសយានដ្ឋានអន្តរជាតិនាទីក្រុងកាប៊ុល។

បើតាមអាជ្ញាធរអាហ្វហ្គានីស្ថានបានបញ្ជាក់ថា មានមនុស្សពីរនាក់បានធ្លាក់ពីលើយន្តហោះ អំឡុងពេលព្យាយាមតោងយន្តហោះជម្លៀសមនុស្សរបស់អាមេរិក ដែលបានចាកចេញពីទីក្រុងកាប៊ុល ក្រោយពេលដែលក្រុមសកម្មប្រយុទ្ធតាលីបង់បានចូលកាន់កាប់រដ្ឋាភិបាល និងប្រទេសអាហ្វហ្គានីស្ថានដោយជោគជ័យ។ ក្នុងនោះផងដែរ អាជ្ញាធរអាហ្វហ្គានីស្ថានបានបញ្ជាក់ថា មានមនុស្ស ២នាក់ដែលជាជនរងគ្រោះក្នុងហេតុការណ៍នេះ ប៉ុន្តែមិនបានបញ្ជាក់ពីអត្តសញ្ញាណជាក់លាក់នោះឡើយ ប៉ុន្តែប្រភពពីសារព័ត៌មានច្រើនបានឱ្យដឹងថា ម្នាក់ក្នុងចំណោមជនរងគ្រោះទាំងពីរនាក់នោះ គឺជាកីឡាករ Zari Anwari វ័យ១៩ឆ្នាំ។ 

មិនត្រឹមតែប៉ុណ្ណោះ បើតាមប្រភពពីជើងហោះហើរនោះបានឱ្យដឹងថា មានមនុស្សជាច្រើនបានព្យាយាមតោងផ្នែកខាងក្រៅយន្តហោះ ដើម្បីចាកចេញពីប្រទេស ហើយពេលដែលជើងយន្តហោះនោះចុះចតក្នុងប្រទេសកាតា ក៏គេបានឃើញមានអ្នកតោងជាប់នៅផ្នែកខាងក្រៅយន្តហោះផងដែរ។

គួរឱ្យដឹងថា ក្រោយពីក្រុមតាលីបង់បានចូលកាន់កាប់រដ្ឋាភិបាលអាហ្វហ្គានីស្ថាន សិទ្ធិសេរីភាពពលរដ្ឋត្រូវបានមជ្ឈដ្ឋានអន្តរជាតិសំដែងការព្រួយបារម្ភជាខ្លាំង ហើយកាលពីពេលថ្មីៗនេះនាយកបាល់ទាត់ស្រ្តីអាហ្វហ្គានីស្ថាន ក៏បានផ្តាំផ្ញើមកកាន់ស្រ្តីដែលធ្លាប់ជាកីឡាការិនីបាល់ទាត់ទាំងអស់ ត្រូវតែដុតឯកសណ្ឋាន និងរូបថតរបស់ខ្លួនពាក់ព័ន្ធកន្លងមក ដោយមានការព្រួយបារម្ភក្រែងមានការធ្វើទុក្ខបុកម្នេញណាមួយពីក្រុមកាន់អំណាចតាលីបង់៕